Life is to learn

اولا كده انا باعتذر عن غيابي المفاجىء الي كان من دون اسباب وباقولكم اني بجد كنت تعبان وباحاول كالعاده اني انقذ نفسي المطحونه دراسيا

ونفسيا وعصبيا

الاسبوع الي فات ده كان صعب موووووووووووووووت اخر حاجه ومكنش في مجال لحتى اني اشرب كوبايه نسكافيه

الي حصل بالتوقيت والميعاد 

الجمعه الماضيه 

صحيت من النوم قولوا كده ع الساعه حوالي 10 ونص وقمت افطر واصلي وكده وخلصت تقريبا على الساعه 12 ميته بقا

وقمت قلت هتنيل اذاكر الماده الخنيقه الي اسمها الله واعلم

Probability

وديه يعني الاحتمالات بعيد عنكم

بس الاقيلكم ايه الي يحصل بعد ما ربنا هداني وفتحت الكتاب

؟؟؟؟؟؟؟؟؟؟؟؟؟

الاقي جرس البيت بيرن طيب وانا مالي مش هافتح انا مكبره الدي ومريحه الجي وقاعده الون وباضحك ع نفسي وباقول هاذاكر بقا

ماما فتحت طيب الاقيها بتنده عليا عشان انزل اكلم اصحابي اصحاب مين بس يا ماما اكيد مش حاسبا

ت تلاقي هدير ولا سمر هيقعدوا معايا شويه وخلاص

بس ع غير المتوقع لقيت مين؟؟ 

بنتين من الحاسوباتيات اهلا وسهلا ازيكم وبتاع هم جايين ليه مش المفروض يكونوا بيدحوا؟؟ طيب دلوقتي نعرف 

بعد التذكر افتكرت اني معايا تلاته اصحابي  في بروجيكت الي IS والمقروض اني مبعملش معاهم حاجه من اول السنه 

ام هند طلعوا الأخوة عاوزيني اصلح معهاهم البلاوي الي في البروجيكت يا فرحتي ضاعت النهار كله والليل وانا قاعده ع الكمبيوتر وهم

كذلك وكان المفروض زميلتنا الرابعه تساعدنا بس للاسف النت يا فرحتي قطع اليومين دووول ومجاش وبقين كل شويه ترن علينا 

اتعميت وضهري اتكسر وكنت فصلت وهنجت ورسترت ميه مرة وعدا اليوم ع خير وسلام  ونمت حزينه لاني مش ذاكرت حاجه

في الماده غريبه الاسم والمحتوى

وعدا اليوم

________________________________________________________

السبت الماضي 

صحيت مرهقه اوي ودماغي ويل بي اكسبلوجين -هتتفجر يعني بعدها اخدت اسبرين واتفرجت شويه ع التلفزيون

وبعدها قررت اذاكر قعدت قدام الكتاب ابصله واكتئب وابصله واكتئب ام هند عدا اليوم ع اني مذكرتش غير شابتر من 6 شاباتر

لولولولوولولولولولولي يا فرحتي نمت مكاني ع المكتب وانا باذاكر ومن التعب مدريتش بالدنيا الا بعد الساعه 8 صباحا 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الاحد الماضي

رحت الكليه العيال اقصد الباسمهندسين كانوا الي معيط والي بيلطم والي بيسوط والي زي اخويا وصديقي فلان الفلاني واقف بعيييييييييد 

وخايف يجي جنب مكتب الدكتور والله عيال يصعبوا ع الكافر وانا ايه ماشاء الله عليا معرفش اساسا يعني ايه 0 او 1 في الماده ديه

ام هند سمعتلي سؤال من هنا ع سؤال من هنا واخدت كتابي وقعدت ع جنب ايه ده كله يا تي ووتر يا بت فريت المنهج كل في ساعتين 

لولولولولولولي ورحت اقعد جنب صديقتي واختي المدونه الحاسوباتيه فستقه اشوفها بتعمل ايه لقيت قاعده جنب الحيط برده بتدح الاحصا

ولقيتها مش فاهمه حاجه بس الشهاه لله البنت فستقه ديه قمر وعسل وكميله وقفت جنبي قبل ما امتحن وقعد تحفظني دعاء كده اقوله قبل ما

ادخل ولما دخلت جالي سؤال عسووول وسهل مووت شكر يا فدوتشي 

وعدا اليوم

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الاتنين الماضي

احزان رياضيه وافراح اي اسيه  ASSS

يعني انا بقا كنت شطورة في الرياضه وكده مش انا لوحدي الدفعه كلها ومن هنا من مدونتي المتواضعه

اعلن شكري وحبي وتقديري للدكتور عائشه 

الاستاذه بقسم الرياضيات بكليه العلوم

ايون لمجهودها ولانها دكتورة قمر وكميله وعسوله وبتشرح كوووووووويس جدا جدا جدا 

فبالنسبه ليا رحت الامتحان مطمنه وحط في بطني بطيخه صيفي وعامله شيتي ودخلت مع الجروب بتاعي

اذا بيا ما اعرفش اجاوب ولا سؤال ونسيت المنهج كله كنت طالعه دمعتي هتقرتك عيني بس قلت الحمد لله وقدر الله ماشاء فعل 

يعني اعمل ايه بس يالا اروح اركز في الاي اس

والاتنين ده بقا كان يوووووووووووووم خلصت واصحابي بتوع الجمعه فارينهم قالولي ابصر ايه اني لازم اخلص البرزنت ايوه البرزنتيشن بتاع مشروع ال IS

وطبعا من برزنت لبرزنت تفرق ايوه اصلي كنت عملت بوربوينت اسنه الي فاتت والحمد لله مكنتش غلطت فيه غلطه كله كان تمام بس

الدكتورة طلعتلي فيه القطط الفاطسه

اه والله بجد هي كانت بتتكلم في اني لازم معملش الوان انسق صح اوي ومحطش صور كتير وحاجات تكنينك وتبع الذوق بس يالا هي

فهمتني لني المفروض معملش الا الحاجات الهاديه والفواتح والبسيطه طبعا ساعتها كنت مخنوقه وطهقان وحسيت بالخيبه ووبخني

الباشمهندس محمد  هشام والباشمهندس خيري وزعلت برده اوي اكمن هم يعني كانوا عملين مشاريع تحفه بشكل تحفه حلجات تجيب شلل 

من كتر روعتها الي حصل في لبرزينتنشن ده بقا كان كالاتي ما انساش اني في ناس ياما جم عندي يوميها وطلبوا اساعدهم وانا ساعدتهم

ونمت ومعملتش مشروعي ولا البرزنت بتاعي بس صحيت ع 10 مساء واشتغلت لغايه 5 صباحا كل ده وايه بتابعني ع الايميل

وريحتلي ساعتين و.....................

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

جه يوم التلاتاء

دخلت وعرضت كويس والدكتور كان مننا مبسوط اوي والدكتور مصطفى بيك ثابت نادر مبيعجبه برزنتيشن راح قالي كميل وكويس

بصراحه فرحت اووووووووي عشان كده لازم اقول

شكرا اوووي يا دكتورة بسمه

ربنا يخليك يارب ويكرمك

وعدا التلات

___________________________________________________________

الاربعاء 

عاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

البورد Seven segment

مين ده يا تي ووتر ??بتاع كده يا جماعه الله اعلم بيها متخدوش في بالكم قال ايه ليها داتا شيت وبنسافر

نجيبها ب200 جنيه ونشتغلها وبتاع وليله يا جماعه . شغالين فيها من العيد ايوه والله

وجيت قلت اروح انزل لجدتي اصلي خلاص هتخنق رحت بس مكنتش موجوده وانا ماشيه كده قدام زاس قوم الاقي ايه..........؟؟

ايه ده دلوعه وتويتي اهلين ايش لونكم دول بنات حاسوباتيين بس صغنونين شويه سنه اولى 

ايه الي جابكم في عز البرد ده دخلت السايبر وسلمت عليهم قلت يعني اجدعن شويه واشوفهم

ايه ايلي ممرمطهم في عز البرد كده وجايبه ع ملا وشهم وجايبين كمان A Nasr وايمورتال كراز

وكل دوول في السايبر بيشتغل رحت البيت وجبت لهم شويه حاجات وشيتات قديمه وصححتلهم برزنتينشاتهم 

والعيال حاسوباتيين صغيرين وبردوا يصعبوا ع الكافر

اه نسيت اقولكم اني كنت رايحه لجدتي شبه حاسه اني ماشيه لوحدي في الشارع

وع الرغم انها منطقه فيها ميكروباصات كتير بس برده

حسيت ان الجو هادي ومفيش حد غيري حسيت كمان اني مش موجوده شبه متخدره او نايمه

ومعرفش ازاي مشيت من بيتنا لغايه هناك كل ديه مسافه  يالا خير هي الكليه بتاعتنا ديه هتشلنا قريب

عدا اليوم

_____________________________________________________

اخر الاسبوع عندي انهارده

الخميس دموع سفن سيجميه

اول مجموعه تتقدم للمعركه اقصد للامتحان  كانت جروبي وماشاء الله ولا جاوبنا ولا سؤال وكل الاسئله كانت ليه

ع العلم ان الجروب فيه واحده الاولى ع الكليه يعني كفاءة وبعد ما الحمد لله الدكتور غسلنا ونشرنا وعصرنا

نده لمعيد وقاله يالا كمل عليهم  وطلعوا الضحايا من اللاب بعدما تم قتلهم وتدميرهم 

ووقفت انا وايوته نقول للعيال اصحابنا ع المهزله البشريه الي حصلت فينا فالدكتور طلع وقالنا مش قلتلكم امشوا

كل واحده فيكم مينس درجتين يالا بقا عشان تكمل

اه لسه الموضوع بتاع التلات برامج الي تبع جامعه المنصورة ده بقا قصه انتظروني

ملحوظه ده شكلي بعد الامتحانات 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

• 
• 
• 
• 
• 

الكلمات البسطه ديه مني لجميع المدونين الي اعرفهم والي معرفهمش ده احساس بس حبيت اوصله ليهم عشان احنا على اعتاب

العشرة ايام الاوائل من ذي الحجه ربنا يكرمنا جميعا  ويجعلنا من أتقيائه ويغفرلنا ويقدرنا نصومهم ونذكر لله والي مبيصليش يصلي 

واالي قاطع رحمه يصله والي مزعل حد يصالحه والي مخانقه مع حد يصالحه والي عاصي والديه يستسمحهم ويارب نبقى احسن امة 

واحسن عشريه عاشت  على الارض

ومن قيل ومن بعد "اللهم اغفر لي ولوالداي ما تقدم من ذنب وما تأخر"

• 
• 
• 
• 
• 

السلام عليكم ورحمة الله وبركاته

أنا عارفه اني عمري التدويني صغير اووووي بس يعني كان نفسي اعمل لوك جديد للمدونة بتاعتي اغير شكلها وتصميمها بصراحه

انا عجبني الشكل ده وبعد ما حطيته وصممتله البانر بنفسي واختارتله الصور بتاعته وطبعا استرجعت قايمة المدونين الي بقرأ ليهم

ندمت اووووووي ووحشني اللوك القديم اعمل ايه بقا ما هو ده الحس الانتمائي بتاعي عموما يارب يكون اللوك الجديد ده شكل حلو والناس

والمدونين الغاليين الي بيعلقوا عندي يكون عجبهم اللوك ويكون مريح لعيونهم الغاليه ياريت يعجبكم اللوك وتحسوه زي زمان

مع تحياتي

Teawater

• 
• 
• 
• 
• 

بحبك وانتي عارفه وياريت متسبنيش 

• 
• 
• 
• 
• 

نظرا لأحداث كتيرة متشابكه مريت بيها الفترة الاخيرة قررت قرار هو اني اخد هدنه كده شويه اعالج فيها الي مشاكل الي حواليا ونظرا

ايضا تني شعرت بان حياتي اظلمت قليلاً فقررت ان ابعد لفترة اقعد فيها مع نفسي

واظبط نفسي نفسياً ودراسياً واهتم بمدونتي الجديده Photoshop World الي عملتها عشان اتعلم فيها انا وزمايلي وكل عشاق

الفوتوشوب مهارات ودروس جديده للفوتوشوب يعني كمان قلت اخلص قصتي الي بكتبها والي هتبقى مفاجأه ان شاء الله وهاحاول استفيد

بالنقد الجميل الي اكتسبته من نشري لقصتي السابقه يارب غبتي متطولش لأني لما باغيب ده معناه حاجه من الاتنين ياما مشغوله يا ما

حزينه وانا بصراحه حاليا الاتنين ادعولي يعدي الميد تيرم ع خير وتعدي الظروف الي بمر بيها ديه كغمامه سريعه عشان ارجع تاني اقف

بعد ترتيب حساباتي وبجد هتوحشوني وزعلانه اوي اني مضطرة اغيب هتوحشني كيارا ومها واحسان بك وشفقه هانم وبرنسييس

بيري وقلم رصاص وسمايلي روز و بيج دريم واي حد حاسباتي هيوحشني و محمد غاليه بتاجه الجميل الي مش هانساه ودكتور عمرو فاروق ودكنورة ناعومي وسلسبيل وقديس الحب "رومنسي"و مامتي شموسه"شمس النهار و ........وكل الناس الي سابوا عندي

ع الاقل تعليق ولو حتى زاروني ولو لمرة وكل عالم التدوين وبوستاتي ومدونتي

هتوحشوني

• 
• 
• 
• 
• 

يااااااااااااااه بقالي فترة كبيرة اوووووووي مكتبش قصص زي زمان انا بحب تأليف القصص اووووووووووي عشان كده
قلت اكتبلكم اخر قصة كتبتها وهي قصه كتبتها لشخصية عزيزة على قلبي اوووووي وبحبها جدا لأنها بالظبط زي الملايكه في طيبتهم وعمري حتى لو فرقتنا الأيام عمري ما هانساها لأنها شخصية الحلم الجميل الي عشته واتمنى طول عمري اعيشه

القصه بعنوان فارس الجب مهطولش وهاسيبكم بقا مع القصه من تأليفي.............

يحكى ان في قديم الزمان
كان هنالك فارس امير مملكة الحب.
احب فارسة اميرة مملكة الجمال وكان يرسل لها خطاباته وقصائده ليعبر لها عن مدى اعجابه بها وحبه الشديد لها وظلت الأميرة تعشق الأمير دون ان يتقابلا او يتصاافحا كلاً منهم عشق الأخر دون ان يراه
ربما يتسأل البعض كيف تقابلا وكيف وجدا كل منهم الأخر واين ؟؟ ارى ان الجواب الوحيد لذلك ان ارواحهم تقابلت في السماء فقمة الحب ان تعشق مالا تراه
وظلا هكذا اعوام يرسمان صورة الحب الخالص ويحفرا ذكرياتهما كلا منهما احب الأخر وعشقه وجسد له صورة الحلم الجميل والذكرى الخالده الا ان اتفقا ان يراها ويتقدم لخطبتها حتى تصبح المملكتين امارة واحدة للعصافير الجميلة والزهور الرقيقه تبدع فيها الحانها وتشدو عبيرها الخالص وقبل اللقاء علمت الأميرة باصابة الأمير مرض بعينيه وفقدانه بصره فقررت ان تختبر مدى احساسه بها فالأحساس وهج الحب الذي يضيئه ويفعهمه بالحيوية فقالت له في خطابها سارسل لك ثلاث مهرات صغيرات من القصر احدهم فقط هي مهرتي لو انك تحبني ستعرفها من دون شك قبل الأمير عرض اميرته وقال لها ان عينياي قد فقدتهم يا حبيبتي لكن اراكي بقلبي ووجداني لأن عيناي لم تراكي قط فقلبي هو من رأكي وارسلت الأميرة مهراتها الثلاث وبالفعل تعرف عليها بفراسة الفارس المعروفه فقد كانت تفوح من المهرة المخصصه رائحة العطور الملكية المميزة وعندما ارسل لها مهرتان الأخرتين علمت انه حقاً احبها وانه هو المختار فقررت ان تذهب له وجمعت كل ازهار الحب بالمملكة واحاطت بها العصافير وارتدت ثوبها المزكرش التي اعدته لليلة الحب الخالصه وذهبت لأميره كبوتقه احاطت بها الأنوار او كماسه تتلألأ وتنير ما حولها وحين ذاك ابصر الأمير وعاد له نظرة من جديد واقسم انها اجمل مما توقع بكثير وانها انارت قلبه قبل ان تنير عينيه وعاشا الأمير يحب اميته كما عاشت الأميرة لأجل اميرها وانجبا طفلان بنت وولد سمياهم حب وحنان حتى يجسدا لهم كل الذكريات الجميله التى عاشاها في السابق

وانتهت الحكاية

• 
• 
• 
• 
• 

تسببت إصابة رجل إندونيسي بمرض نادر بتحوله إلى "شجرة"، حيث صار جسمه شبيهاً بالجذع، بنيما تحولت يديه إلى ما يشبه الفروع. وكان ديد (35 عاماً) يعمل كصياد للأسماك، قبل مرضه الذي لا يصيب إلا واحداً من كل مليون شخص، إلا أن تحوله التدريجي إلى ما يشبه الشجرة تسبب بطرده من عمله، وهجر زوجته وولديه. واضطره ذلك للعمل في سيرك مقابل قوت يومه، حيث يظهر أمام الناس على أنه حالة نادرة.ورغم أن بعض الأطباء المهتمين بدراسة حالته قاموا بإجراء جراحة لإزالة بعض هذه الزوائد الغريبة ومنابعها في جسده، إلا أنها عادت لتنمو من جديد، وبسرعة كبيرة. واهتمت قناة "ديسكفري" الامريكية بحالته، وبثت تقريراً مفصلاً عنه، معربة عن أمنياتها بتبني أي طبيب أمريكي لحالته، وعلاجها مجاناً، وفق ما نقلت صحيفة "الراية" القطرية الأربعاء 21-11-2007.من ناحيته، قام البروفسور انطوني جبسبري، من جامعة ميريلاند، بأخذ عينات من جسم ودم ديد، ليظهر أن الأخير يعاني من مشكلة جينية نادرة، ساعدت على زيادة حجم الاورام، ما جعل الفيروس يتمكن من خلايا جسده بالكامل.ويرى دكتور أمريكي أخصائي في الجلد أن هناك أملا في علاج حالته فيما لو سمحت السلطات الإندونيسية بذلك، وحصل "الرجل الشجرة" على تأشيرة دخول للولايات المتحدة

حاولت اضع الفيديو ولكن يبدو هنالك بعض المشاكل في السيرفر اليكم لينك التحميل

اللينك الخاص بالفيديو

http://www.youtube.com/watch?v=rzcWsmOGpRM&eurl=http://www.omrey.com/vb/t305.html

• 
• 
• 
• 
• 

أول رساله ليا بعد العيد ما خلص وخلاص اهوهندخل في معمعة الدراسه يعني هاقول لنفسي الكلام ده اصبر نفسي على الخيبه الي انا فيها وهي اني مش باخلص كتير ونايمه في العسل اوي. ويا دوب اخلص حته الاقي الدكتور خلص فصلين يا عيني على الفشل
لألألألأ مش هنبتديها من اولها كده فشل ايه اعوذ بالله امشي يا شوشو
فينك بقا يا Teawater لما كنت يتقولي لماما زمان "يا ماما امتى هادخل سنه اولى " الله مش اقدر اوصف بصراحه شعوري وفرحتي وانا صغنونه بزعرورتين وكنت باتمنى بقا اكبر بسرعه وادخل سنه اولى أبتدائي وكنت اقعد اعد على ايدي اصل مامتي الشطوره كان بتعلمني وتذاكر لي يا حبيبتي يا قلبي ربنا يخليكي ويديكي الصحه يارب



يا حبيبتي يا مامتي كنتي بتعلميني وتذاكري لي و تحبيبيني في المذاكره مش عارفه انا لازم اوريكي البوست ده اول ما اخلص مش معقول يعني مش اشكرك بس اقولك ايه مش لاقيه كلمه يا حبيبتي اقولهالك توفيكي حقك يا حبيبتي.. المهم فضلت احب المذاكره والدراسه كل ما تبدي سنه من حياتي وتكون في مكان جديد _مدرسه اعدادي _ مدرسه ثانوي_كنت بابقا فرحانه بالعالم الي داخله عليها وكنت دايماً احب اتعرف على كل الي حوليا ايوه ديه كانت حاجه لذيذه وجامده ان يبقى ليك اصحاب تحبهم ويحبوك ويفضلوا معاك وحواليك بس
مع الأيام الأصحاب بيبعدوا ويسافروا ويمشوا او ممكن حتى يكون جنبك بس مش لاقيهم او المساحه وسعت اوي بينكوا اه بس انا فاكرخ ذكريات كده اوي حبيت اقولهالكم نضحك اة نعيط مش مشكله بس اهي ذكريات والسلام
المدرسه الأعداديه:
أ/ أحمد مازن مدير المدرسه
انا هاحكي اول يوم وبس عشان الأستاذ ده ليه ذكريات لاتنسى احـــــــــــــــــــمــــــــــــــــــــد مازن يا مامي ايوه البنات كانوا بيترعبوا لما يسمعوا اسمه لأنه كان شديد يعني بيعبط البنات او الولاد كل عنده سواء المهم انهم يفهموا معنى كلمة "عـــــــــــــــــــيــــــــــــــــــــــــــــــب"
ايون يفهموا معناها كويس جداً ويعرفوا يعني ايه العيب والغلط عشان ما يعملهوش ارفع القبعه ثناءً واحتراماً لك استاذي الغالي
المهم ان لقيت نفسي مطلوبه في مكتب المدير .. ايوه اصلي انا شقيه حبتين باحط انفي في كل حاجه ومش باعديها كده بس..ياخبر انا عملت ايه بس ده لسه يا جدعان اول يوم يعني عصفوره بازقزق لسه ماعملش مصايبي المعروفه هههههههههههههه
رحت والعرق يتصبب من جبيني _ايه العربيه الفصحى ديه يالا عدوه محدش يحط في باله_ لمكتب المدير بيتهيقلي لو كان كح بس كحه صغنونه كان اغمى عليا رفع راسه وقالي بنظرته المعروفه انتي فلانه علان راح قالي طيب انتي شكلك حد مش هادي شكلك متعبه ومثيره للمشاكل.!! يا نهار اعمل ايه بقا دلوفتي كل الي عملته صكماً بكماً
راح قالي عاوز نمرة بابا _الموبيل يعني_ عشان موضوع مهم.بابا يا نهار اسود من اول يوم كده استدعاء ولي امر يا نهاااااااااااااااااااااار مش فايت المهم عطيتهالوه راح قالي اتفضلي يقا انتي دلوقتي على فصلك. وقعدت طبعاً من بعد الفسحه مش فاهمه اي حاجه!!!!
_الفسحه الله ذكريات حلووووووووووه فينها دلوقتي تحولت وتمحورت للبريك الممل الخنيق_لغايه ما جه بابا واخدني وعرفت ان الحكايه كانت حكايه شغل وبس يا عيني عليا دمي نشف بس هو كده تمام "الي على راسه بطحه بيحسس عليها"
هههههههههههههههههههههههههههههههههه
كانت كل سنه ليه ذكرياته الجميله وحواديتها الحلوه زي مايوم بوظت ماسوره الميه في الثانويه بنات_كنا بنتوضا والحنفيه مكنتش راضيه تفتح قولت اقوي ايدي عليها وافتح ولأن طبعاً الأساسات الحكوميه عليها صيانه دوريه ومتجدده الحنفيه ماستحملتش وانفجرت الماسوره في قلب الحمام واحنا بلغنا فرار وطيري يا حمام وبعديها عملت الملاك البريء الي ميعرفش اي حاجه عن الميه اساساً وصديقتي العذبه الجميله يارا قعدت تضحك على الموقف تلات ايام
هههههههههههههههههههههههههههههههههه
اه بيتهيئلي معدش فيه ذكريات في الجامعه حلوه كده ولا اصحاب احلى من دول اصبح حالي في الجامعه اشيه بالصوره ديه الي تحت الكلام يالا ادينا قاعدين يمكن يتحفنا الزمان بحكايه زي زمان


أنا صدعتكم اكيد بس حقيق ارتحت كتير لما حكيت عن احلام عشتها جميله ضاعت مني دلوقتي

• 
• 
• 
• 
•